行程規劃

一年點樣編排？四個參考 Plan

工作假期一年好快過。最多人問嘅唔係「可唔可以去」，而係「呢一年應該點安排」。以下係我哋歷年最多參加者採用嘅四種編排，每個 Plan 包括主要行程、工作、住宿同開支—— 冇邊個啱晒所有人，揀啱你節奏嘅，就係好 Plan。

＊金額為 2026 年中參考水平；時薪以東京 ¥1,226／大阪 ¥1,177（最低工資）起計。

⭐ 最推薦安定儲遊型

Plan A：一年長留大城市（東京／大阪）

適合：第一次長期喺外地生活、想儲到錢又想玩勻日本嘅大多數人

主要行程

全年以一個城市為家。第 1 個月安頓（證件、開戶、家電、熟習環境），第 2 個月起穩定返工；每儲夠假期就嚟一轉 2–4 日嘅國內短線遊——京都奈良、北海道、九州、沖繩…… 因為地點固定、更表穩定，一年閒閒哋去到 6–10 個地區。

工作

一份穩定兼職為主（連鎖餐飲／便利店／零售）。因為地方固定，收入源穩定；做得耐仲有得同店長傾時薪同假期，愈做愈著數。全年實際有正常收入嘅月數係四個 Plan 之中最多。

住宿

Apartment 一年長租——東京約 ¥70,000–90,000／月，大阪約 ¥50,000–70,000／月（Apartment 定 Mansion 點揀／東京分區／大阪分區）。一簽約就鎖定咗全年最大嘅一筆開支，唔會俾旺季淡季牽住走。

開支參考（東京・每月）

房租（Apartment）	¥70,000–90,000
伙食（自炊為主）	¥30,000–50,000
水電煤＋網絡	約 ¥15,000
電話（格安 SIM）	¥1,000–3,000
交通（返工多有補貼）	¥0–10,000
每月支出約	¥120,000–160,000
收入參考（週 5 全職兼職）	約 ¥190,000–220,000
每月可儲／旅費	約 ¥40,000–80,000

優點：穩定、開支最少、可以去更多唔同嘅地方玩——因為錢同假期都儲得起，短線旅行次數反而係最多。

🎓 學習型長留＋日語課程

Plan B：長留大城市＋ 3 個月日語課程

適合：想一年過得更充實、順便打好日語底子嘅人

主要行程

同 Plan A 一樣以一個城市為家，分別係頭 3 個月報讀短期日語課程—— 用工作假期簽證直接報讀，唔使另外辦學生簽證，方便得多。第 1–3 個月半日返學＋輕量打工；第 4 個月起全力打工＋儲假去短線旅行。

工作

讀書期間輕量返工（週 2–3 日）；畢業後同 Plan A 一樣穩定全職兼職。日語好咗，搵工選擇即刻闊一個檔次——樓面、接待呢啲時薪較好嘅崗位都入到閘（日語學習專區）。

住宿

同 Plan A：Apartment 一年長租（東京約 ¥70,000–90,000／大阪約 ¥50,000–70,000）。

開支參考（平均每月・東京）

學費約 ¥150,000–250,000（3 個月，視乎學校），下表已攤分到全年計；頭 3 個月因為返學，收入會少一截。學校選擇同報名，蜜柑留學免費諮詢。

房租（Apartment）	¥70,000–90,000
伙食	¥30,000–50,000
水電網＋電話	約 ¥16,000
學費（全年攤分）	¥13,000–21,000
每月支出約	¥130,000–175,000
收入（全年平均）	約 ¥150,000–190,000
每月可儲（平均）	約 ¥0–40,000

優點：穩定、開支較少、可以去更多地方玩，仲要行程充實、學到日語—— 條數其實好抵：學費嘅回報係之後九個月更好嘅工作選擇。

🏂 體驗型大城市為家＋季節轉移

Plan C：長住大城市，開季就去滑雪／潛水

適合：為咗某項季節活動（滑雪、潛水、行山…）而嚟日本嘅人

主要行程

以東京／大阪嘅長租平房做「基地」。活動開季就短期轉移——滑雪季（12–3 月）去雪場、夏季去沖繩潛水，做 2–3 個月住み込み（包食宿）工作，季尾返基地繼續城市生活。

工作

平季：城市兼職；開季：リゾートバイト（時薪約 ¥1,200–1,600 兼包食宿）。轉移期間食宿近乎零開支，其實係儲錢高峰期，仲要日日玩到心愛嘅活動。

住宿

基地＝平價長租 Apartment（照 Plan A 價位）；轉移期間＝員工宿舍。轉移嗰幾個月基地照供平租，但因為租金本身平，住宿開支唔會暴走。

開支參考（平均每月）

城市月份正常開支、轉移月份食宿近乎零，拉勻全年平均：

基地房租（全年供）	¥50,000–90,000
伙食＋生活（平季）	¥30,000–50,000
水電網＋電話	約 ¥16,000
轉移期食宿	近乎零（包食宿）
每月支出約	¥70,000–140,000
收入（全年平均）	約 ¥150,000–200,000
每月可儲（平均）	約 ¥30,000–70,000

特別提示：如果揀呢個 Plan，一定要一開始就先租好長期租約嘅平房。長租審查一般要求簽證剩餘約一年——如果你先去別嘅地方玩咗幾個月，到想返嚟租平房時，簽證餘下時間不足一年，好大機會租唔到（審查點運作），最後被迫全年住貴嘅短租。次序千祈唔好調轉——出發前經免費租屋代辦一步搞掂就最穩陣。

優點：深度體驗自己最鍾意嘅活動，同時住宿開支受控，唔會失預算。

🎒 流浪型每季轉移地區

Plan D：多次轉移，每季搬一個地方

適合：目標係「住勻幾個日本」、儲備充足、接受高不確定性嘅人

主要行程

每 2–3 個月轉一個地區，例如：春・東京 → 夏・沖繩 → 秋・京都 → 冬・北海道。每次轉移都由零開始：搵屋、搵工、辦住址變更。

工作

每區重新搵工。現實係：喺日本返工，頭一個月通常係試用期，工時較少、人工非常低；到第二個月工時正常，你又要準備離職搬家——實際有正常收入嘅時間非常短，所以全年收入係四個 Plan 中最低。

住宿

以月租公寓／服務式公寓（約 ¥120,000–180,000／月全包）或 Share House（約 ¥60,000–90,000／月全包）為主。短期租房一般非常貴，仲會因旅遊旺季而大幅波動——櫻花季嘅京都、雪季嘅北海道，隨時貴成倍。

開支參考（每月）

住宿（短租）	¥60,000–180,000（旺季更高）
伙食＋雜費	¥40,000–60,000
轉移成本（車費／行李／重新置裝）	每次 ¥20,000–50,000
收入（試用期＋短工期）	僅約 ¥50,000–120,000
結論	大部分月份要食老本

優點：可以長時間、貼地噉體驗幾個完全唔同嘅地區，回憶密度最高。

缺點：行程非常不穩定、房租隨旺季波動、收入非常低。呢個 Plan 本質係「用儲備買體驗」——出發前嘅儲備要明顯多過其他 Plan 先好揀。

四個 Plan 一眼對比

	Plan A 安定儲遊	Plan B 充實學習	Plan C 季節體驗	Plan D 流浪
穩定度	★★★★★	★★★★★	★★★★	★
開支	最少	少＋學費	受控	最高
收入	最穩最多	頭3個月少	穩定	非常低
去到幾多地方	多（短線多次）	多	集中喺活動地	少而深
一句總結	大多數人嘅最優解	＋日語嘅最優解	為興趣而嚟	用錢買體驗

唔肯定邊個 Plan 啱你？

嚟一場免費分享會，我哋同前輩幫你按預算同目標逐項計；或者直接 WhatsApp 傾傾你嘅諗法。